He Waiata nā Tokoahu ki a Tū-te-rangiānini, Ngāti Tamaterā
Tokoahu and Tūterangiānini were influential rangatira of Ngāti Tamaterā their descendants included Taraia Ngākuti and Tukukino Te Ahiātaewa, among others. This waiata was found in George Grey's Ko nga Moteatea me nga Hakirara o Nga Maori, published in 1853. It appears here unedited and I have added some explanatory notes below.
HE WAIATA, TAUTITOTITO, NA TOKOAHU, KI A TU-TE-RANGI-A-NINI.
E whiti e te ra e maene ki te kiri,
Whakarongo ki roto ra e haruru, kei te horu tai,
Kei kupu tararau hei maka mai nei, ki te maunga hakahaka;
Tirohia e koe, ki Kaitarakihi,
Ki Whakairi, ki Moehau;
Ki te Arohauta, e tu mai nei te taea te rourou,
I taoroa atu te maunga o te hau a uru, ka tairite tonu ki te moana.
Whakarongo ki roto ra e haruru, kei te horu tai,
Kei kupu tararau hei maka mai nei, ki te maunga hakahaka;
Tirohia e koe, ki Kaitarakihi,
Ki Whakairi, ki Moehau;
Ki te Arohauta, e tu mai nei te taea te rourou,
I taoroa atu te maunga o te hau a uru, ka tairite tonu ki te moana.
Ko Mana, ko Tukino e kiia mai nei e koe,
E haere atu ana he papanga pounamu,
E taea te kikini te poho o Pomare, o Maukiringutu, o Tupoho,
O Te Rangikaheke o Te Apoapo, te puna i Rotorua,
I whakaaroa atu, na Te Kowheto koe kia hoki mai te pito iti ki te iwi.
E haere atu ana he papanga pounamu,
E taea te kikini te poho o Pomare, o Maukiringutu, o Tupoho,
O Te Rangikaheke o Te Apoapo, te puna i Rotorua,
I whakaaroa atu, na Te Kowheto koe kia hoki mai te pito iti ki te iwi.
I pokaia e koe ki Waitakaruru, ko Te Kowhawha,
Naku i piki atu i nga hiwi maunga ki Tuaahuoure,
I hopukia ki roto ki te purotoroto i whakarongo ki te rere i Waikato;
E te tini, e te rau ki a kai te taringa, ki te ngohi mau reke,
Nana i whakahua mai he tino kore, koia i taku ringa.
Naku i piki atu i nga hiwi maunga ki Tuaahuoure,
I hopukia ki roto ki te purotoroto i whakarongo ki te rere i Waikato;
E te tini, e te rau ki a kai te taringa, ki te ngohi mau reke,
Nana i whakahua mai he tino kore, koia i taku ringa.
Tenei e tama te putea ki naku i tari mai,
I haere mai raro i te muri Tokerau,
I te tonga wai kau e pu mai ki te kiri,
He huinga korero te tangata panirere, i kupukupua ai,
E pai Matahi hei whakaitanga mate,
Ma Te Raepakaru, he whanautanga piro,
Tena te kore noa ko te aitanga o Rakakuku ki Whaiapu.
I haere mai raro i te muri Tokerau,
I te tonga wai kau e pu mai ki te kiri,
He huinga korero te tangata panirere, i kupukupua ai,
E pai Matahi hei whakaitanga mate,
Ma Te Raepakaru, he whanautanga piro,
Tena te kore noa ko te aitanga o Rakakuku ki Whaiapu.
Mawai e whakahoro te keho i Rangitoto,
Te toka i Wharengaehe,
I kurua moetia, ko te patu huarua, i torona ki te ringa,
E haere atu ana i te hinanatanga o te ihu o Tongarewa i te ihu o Komako,
I akina ki waho ki te moana tu hohonu ki Ouru,
I haupatua ki te rae ki Whamango ka mene tonu,
He rite te takirihauora i te hunga mate atu ki te keno i waiho i te ao.
Te toka i Wharengaehe,
I kurua moetia, ko te patu huarua, i torona ki te ringa,
E haere atu ana i te hinanatanga o te ihu o Tongarewa i te ihu o Komako,
I akina ki waho ki te moana tu hohonu ki Ouru,
I haupatua ki te rae ki Whamango ka mene tonu,
He rite te takirihauora i te hunga mate atu ki te keno i waiho i te ao.
E rarapa ana a taua nei patu i nga rangi ra e,
Mau e whakaaro mai ka tuatoru ki te ngutu maioro ki Wetokarahi,
He urunga ka taka i te moana ka paneke ki Hauraki,
Ki te papa no Rotu, ki te au tete whawhenga,
He ripanga paraoa, ki Kauaeranga,
Ki te rua o te tini o te mano,
I te wehi o te patu, e.
Mau e whakaaro mai ka tuatoru ki te ngutu maioro ki Wetokarahi,
He urunga ka taka i te moana ka paneke ki Hauraki,
Ki te papa no Rotu, ki te au tete whawhenga,
He ripanga paraoa, ki Kauaeranga,
Ki te rua o te tini o te mano,
I te wehi o te patu, e.
See here:
https://nzetc.victoria.ac.nz/tm/scholarly/tei-Whi05Anci-t1-g1-t2-body-d8.html
Notes
Kaitarakihi - he maunga
Whakairi - he maunga
Moehau - he maunga
Arohaauta - he maunga, Te Aroha-a-uta
Pomare - he rangatira nō Ngā Puhi, i mate i te awa o Waipā, i Waikato
Maukiringutu - ko Nepia Taratoa pea tēnei o Ngāti Raukawa, ko tāna tama rānei.
Te Rangikāheke - he rangatira nō Te Arawa
Te Apoapo - he rangatira nō Te Arawa, i uru ano tēnei ingoa ki te pātere a Erenora Taratoa o Ngāti Raukawa. ('Pōia atu taku poi')
Waitakaruru - he kāinga kei te uru o Hauraki, kei te pito whakarunga o ngā wai o Tīkapa
Te papa nō Rotu - he wāhi tapu nō te tohunga, ko Rotu tētahi o ngā tohunga whai mana o runga i te waka o Tainui, koia hoki ko 'Te Papa-o-Rotu' he whare wānanga i tū ki te take o Pirongia, i Waikato.
te aute te whawhenga - 'he aute tē awhea', he kupu pepeha tēnei nō Hauraki mō te mana me te momona o tēnei whenua. Arā tōna mana i taea ai te whakatupu i te aute, inā hoki 'kāore i awhea'. Nō Hawaiki rā anō tēnei aute, he mea hari mai i runga i te waka o Tainui. Kāore i te rite ki te aute i tupu noa mai i ēnei motu. Kei te kōrerotia kētia te aute i haria mai i Hawaiki. Nā Marama, nā te wahine iti a Hoturoa te aute i whakatō ki Waihīhī, i te uru o Hauraki. Tērā ētahi atu i tahuri ki te whakatupu i te rākau nei, engari, kāore i taea. Kotahi te whenua i taea ai te whakatupu i te aute nei, ko Hauraki. Nā reira te pepeha e mea ana, 'Haere mai ki Hauraki, he aute tē awhea.'
Comments
Post a Comment