'Aue, aue, he aha te hara e te iwi?', he waiata nā Tokatapu o Ngāti Paoa

This waiata was composed in response to a waiata by Tokoahu of Ngāti Maru. See here.

Aue, aue, he aha ra te hara e te iwi,
I houa mai ai.
No waho nga hara,
No Piri-pekapeka
Na Koi-kihi ra
I koropatutia,
Ki te koropatu taniwha,
I tiu atu ra hoki
Ko te manu na
Rua-ki-te-tonga e;
Mo aku hakari e maha,
Mo te Puka-tea;
Mo Takahi-paru.
Koe hau kotiri
Ora tonu,
He tupuna wareware,
I haere hau kore.
Na waho ano, ko
Te Rawhiti horo,
Na te Rupe ano
I tamaoa atu
Ki te waka hakari;
E kiia mai na,
Ko te Rahi-a-ti-puhi;
Me homai marire
I oku manaaki,
Me Wai-kato hoki;
Ka pau te tanutanu
Ki Rua-oneone.
Maru-tuahu ra
Ka inu i te wai roke
Me whakawi atu
Ki te wai weruweru,
Ma nga tamariki;
I ou hinga noa,
I ou mate noa,
Ka patua nohotia,
Ka kawea tou matua,
Ki te aroaro o te Wera
Kia tirohia mai te tamaiti;
He tamaiti raru,
Ka kai ewe,
Ka kai raru,
Ka kai hokowhitu,
Ko te Tamu-roto ma.
No muri nga pu
Ka hua mai.
He aha kei Manaia?
He o no Raro-kena.
He aha kei Tiko-uma?
He o no Whare-kawa.
Me Moe-hau-nui
He o no Pakihi;
Ka waiho nei Ra-ao,
Ka iri nei au,
I te aro akapa,
E kiia mai nei
“He umu taurekareka.”
Me ako atu koe,
Naku rapea te Rau-kai-atua;
Naku rapea ko te Pure-whai-wawe
Ki rawa mai koe,
Ka kai whenua tahi.
Me nuka e au
Me horohoro rawa.
Me tapu ihi ake,
Kia ngeungeu ake,
Ropa i raro ra. Naku i whakahoki
Nga manga rotu,
O te Ahu-mua,
I whiua mai nei;
Koronae nui ana
I Tara-ru ra;
I te aroaro o te Ao;
I riri kau ano,
Ki te papa koneke;
Ka kite koe;
Whatiia i te pu,
I te mata,
Ko te Kowhai kia ngaro
I reira, e kore au e ngaro
Ka whiti ki te ao na i.

The Ancient History of the Maori, His Mythology and Traditions: Tai-Nui. [Vol. V] (pp. 93-95)