'Taku tamaiti poti e', he waiata nā Te Popo o Ngāti Tamaterā

'...he whawhai waiata tenei na Nga-ti-tama-te-ra te tuatahi, ara na Te-popo...'

Taku tamaiti poti e;

Hohoro te korikori,
Kia utaina koe
Ki te ihu o te waka,
Hei kawe i a taua
Nga tai papaki rua.
Waho o Kauere;
Kia whakarongo koe
Te papa o te pu,
Kei o tupuna,
Kei o matua;
E kore e hoki mai
Kia taua na i.
E ninihi kau ana,
Nga tai o te uru,
Ka mahue Wai-au;
Ka mahue Tiko-uma;
Ka mahue Manaia;
Ka rere ki Hau-raki.
Kei whea hoki ra
O korero nui e Tu-a-whio,
Kei tarawhete (taraweti) koe,
Ka kiia atu koe,
“Numinumi kau hoki
E Ware i au ki te ara
Kohuru,” na te Tahiwi
Ra nga he i whiua,
Ki waho ra.
Na Hongi-hika ra
Nga he i Wai-hi i
Te Whare, ko te Ahu-mua
Ma takoto tonu atu na,
Ko Rama-roa ma, waiho
I Manaia, ka mahue
Ko te papa e.
Na Houhou ra Te-wiwini-o-te-rangi,
Na ratou ko Rangi-tawhi-ao,
I whiua ki te Tonga,
Me ko Piri-pekapeka,
Ka rato i te kino e.
Ki rawa mai Tawa,
Ka tehe i tana ure;
Kiia atu e koe
Ka tehe i te niho
O Takurua, kii rawa
Mai ia, “Tenei te wheua”
Kiia atu e koe na
Mata-whao-rua
Hua taki noa ana,
Mokai koiwi, tamia
Atu ana, he hau
Taami rua, te tai;
Taua nga rake
Manawa i waho o Wai-papa
Ki tou tini ra
E moe noa mai ra e tama.

The Ancient History of the Maori, His Mythology and Traditions: Tai-Nui. [Vol. V]  (page 90)