'Kauwhautia mai te kauwhau o te riri', nā Tokoahu o Ngāti Maru

A response by Tokoahu of Ngāti Maru to a waiata by Te Popo of Ngāti Tamaterā. See here.

Kauwhautia mai te kauwhau o te riri [kino],
I tupu (pu) ai te riri,
I tupu (mau) ai te pakanga,
I hirihiria ai te niho o Takurua,
Ka rato tahi ano
I (ki) te papa teretere
Ki Wai-kawau,
Ki Puke tehe ra ia,
Ka rere ki Tauranga;
I a nei e te iwi
Kia mau te pupuri,
I te iti oneone,
I kiia iho ai.
E (no) muri e tama
Kia ata whakaputa;
Whakaputa o reo ki
Te kauwhau o te riri;
Ki te korero o te pai,
Kia hapainga koe
E te mano e takoto.
Nei koa taua
Te kiia mai nei
He kainga mahue;
E mahue ana Wai-au
Mo Whare-kawa-nui
E mahue ana Tiko-uma
Mo Pakihi, mo Kohukohu-nui.
Ka rato i te kino.
Oroia mai e koe,
I te tai marangai,
Kia motiti
Kia motata;
E kore e ngaro,
Ko te manu
Na runga, e
Horo i te moana.
Herea mai e koe
I a Puhi-taniwha-rau
Hei huna kia ngaro;
Nowhea e ngaro,
He takere waka nui,
Ko te potiki toa
Na Maru-tuahu;
I pepehatia ai,
“Ko Te-ngako-ringa-kino”
E hara i a nei
I te Whau tu ake,
He riri pupu ake
I te heketara,
Hei whakarongo iho
I te kopa o te whare.
Nei koa o tupuna
Te kiia mai nei
“He pahore i te niho.”
E pai ana tena,
Ka ata taami atu;
Ki te umu taurekareka,
I whakaita iho i.
Maua e koe ki
Te waka huare,
Kihai koe i kite
I te whanaunga awatea,
I te manawa tohe riri;
Ma te atua o te po e,
Mo Hahu-koiwi
I whakatohaia,
Mo Tarake-puha,
I tauwehea ai,
Mo te Aihi-tapoa
Ka mamao ki tawhiti.

The Ancient History of the Maori, His Mythology and Traditions: Tai-Nui. [Vol. V] (pp. 191-193)